政Whats噏：財政預算案下月出爐　多名議員促再次派發消費券

香港新冠肺炎疫情嚴峻，隨新一份財政預算案將於下月出爐，唔少議員都希望政府藉此再派發電子消費券刺激經濟。有政黨今日(27日)會面財金官員，提出多項對財政預算案嘅期望，包括要求政府派發不少於5000港元嘅電子消費券，推出寬減百分百薪俸稅等措施等。

議員陳克勤話，所屬政黨提出多項一次性紓困措施，包括希望政府派發不少於5000港元嘅電子消費券，寬減百分百薪俸稅、上限20000港元，寬減每戶每季2500港元嘅差餉，提供每戶2000港元嘅電費補貼，為公屋住戶代繳1個月租金等。佢話消費券並非只係派錢，其實有提振經濟嘅作用，相信對各行業有正面效應。會面雖然互不引述，但佢認為會面坦誠、有結果，官員有認真記錄咁話。

另外，議員劉國勳批評政府推動北部都會區嘅時間表令人失望，建議每年最少預留1000億港元，做好北部都會區建設，希望成立專責辦事處處理相關事宜，同埋敦促政府同內地部門做好對接工作呀！