政Whats噏：楊雪盈聲稱去咗轉英國　眼利網友踢爆亂噏

舊年唔少民主派人士因社會形勢同自身風險，決定離港遠赴外國。灣仔區議會前主席楊雪盈因前年參與民主派「35+」初選，涉違反《港區國安法》，被控「顛覆國家政權罪」，獲准保釋後已較少公開露面，反而就周不時喺社交平台貼文。唔知佢係咪都好想離開香港，今日(6日)就上載一張背景喺經典巴士嘅相片，仲話「啱啱去咗轉英國」喎！

嗰架經典巴士貼上咗「BRITISH AIRWAYS」嘅英文字，楊雪盈就話自己去咗轉英國，但有眼利網民就發現遠方其實仲有一架本地退役巴士，直接踢爆楊其實只係喺香港。至於呢架經典雙層巴士，其實早喺2017年就已經喺香港灣仔展出。

依家多名民主派人士，例如因涉煽惑他人喺立法會選舉中唔投票，被廉政公署通緝嘅前香港眾志常委羅冠聰、前區議員劉珈汶同李軒朗，仲有前區議員丘文俊等人都身在英國。之不過，對於有初選案在身嘅楊嚟講，案件仲未完成審理，佢想離港去英國睇怕都仲要一段時間喇！