政Whats噏：民主黨革除梁翊婷蘇逸恒黨籍　暫緩凍結李華明黨籍半年

民主黨(白鴿黨)副主席梁翊婷、暫離港赴英嘅黨友蘇逸恒同「元老」李華明去年擅自以個人名義支持黨外立法會選舉候選人，涉違黨紀被投訴。該黨中委會今晚(16日)開會通過紀委會革除梁、蘇黨籍；至於李因配合調查程序又有作出上訴，故暫緩執行凍結李黨籍半年嘅建議。

該黨主席羅健熙會見記者時話，今次係處理黨內紀律問題，該黨喺過去立法會選舉中亦曾批准黨員支持候選人，但由於3人支持候選人嘅決定未獲中委會同意，故屬違反章則。

佢指中委會討論時重視3人係咪尊重紀律同配合程序，其中李一直配合紀委會調查，亦有按程序向中委會上訴，同時應邀出席今日會議作解釋，中委又考慮佢過去喺黨內貢獻，包括作為籌款委員會主席及前立法會議員，綜合各方面因素決定作「緩刑」處理。

至於梁及蘇方面，羅指兩人事發後未有出席中委會會議解釋，又拒出席紀委會聆訴及無提出上訴，過程中對該黨紀律不聞不問，亦唔尊重黨規，故中委同意紀委會作出嚴厲處分；而梁翊婷回覆查詢時，就話對中委會決定「一笑置之」。

至於點解李嘅處分與兩人情況唔同，佢就話當事人身份都係考慮之一，即李係普通會員，但梁及蘇分別係副主席及中委前成員，故今次處分有差異。

李華明回覆東網查詢時話，佢喺會上用咗一個鐘同中委首次坦承交流，解釋為何支持當時仲係候選人嘅狄志遠及點解早前對中委作批評。佢形容今次會面好「正面」，並無惡意批評，認為過程中令佢哋明白自己多啲，對於中委會冇維持原有決定，反映今次交流起咗作用。而據佢了解，如果半年內無再違反黨紀，有關凍結黨籍嘅建議就會獲取消。

喺去年立法會換屆選舉前，該黨曾向有意爭取黨員以個人名義支持嘅候選人發問卷，以決定是否批准申請。最終只有荃灣區議會前副主席李洪波獲批准表態支持候選人劉卓裕。而3人就喺未經批准下以個人身份分別支持另外兩名候選人。

有黨員認為佢哋違反黨紀，就事件向該黨紀律委員會投訴。事件中主角之一嘅梁翊婷及蘇逸恒就未提出上訴，至於李華明早前就批評有中委會成員外洩會議內容，對中委已失去信心，曾揚言放棄上訴或考慮退黨喎。之但係，雖然佢多次透露退黨意欲，但最後又改變主意，都係決定提出上訴。