政Whats噏：立會通過逾2千億撥款　鄧家彪：永久離港不應派消費券

因應新冠肺炎疫情，立法會今日(16日)透過視像形式召開大會，不過議程就大幅壓縮，亦不設質詢時間，只係處理具立法效力嘅事項，包括審議根據《公共財政條例》動議一項擬議決議案，議決批准一筆約2,705億港元以內嘅臨時撥款。會上多名議員關注撥款開支嘅詳情，亦指政府要掌握民情抗疫，更稱唔應該派消費券畀永久離港者，決議案最終喺無爭議同無記名表決下，火速獲得通過。

該筆臨時撥款喺以便於新財政年度開始前，政府有足夠資金繼續提供公共服務，當中包括新一輪消費券計劃，涉款664億港元，同埋120億港元嘅防疫抗疫基金，至於該筆臨時撥款嘅款項約相當於《2022年撥款條例草案》下全年撥款總額嘅39%。

議員盧偉國指撥款有迫切需要，佢以工程業界為例，疫情下飽受供應鏈短缺及成本增加等問題，令工程制度滯後，因此通過議案有助解決目前困境。社福界議員狄志遠認為政府可以更有效運用資源，撥款能否用得其所先係重點，指政府應該制訂疫情藍圖同目標，同時要掌握民情，相信直接派錢畀市民紓困較有成效。佢又話好遺憾過去兩個星期所目睹嘅老人院情況，好多長者染疫後孤立無援，批評政府行政安排失當。

至於議員鄧家彪，強調大筆撥款用於抗疫，促政府日後應詳細交代開支內容，而佢亦指依家有好多市民已選擇永久離開香港，佢哋點樣領取同使用消費券亦都成疑，因此唔應該再向永久離港人士派發消費券，政府亦可從中節省3至4億港元開支。議員林新強就希望特區政府可善用資源，做好抗疫工作，唔好再令市民失望。此外，大會最後亦用咗1分鐘時間，處理由議員梁美芬動議嘅延展附屬法例修訂期限嘅擬議決議案。