政Whats噏：擔心有手尾跟　錢寶芬出走英國

又有社運人士出走英國。人民力量成員錢寶芬喺本月初離港，取道杜拜前往英國，已順利同喺當地讀書嘅兒子會合。同其他移居英國嘅港人唔同，佢事前並無申請BNO Visa，仲要舊年年尾先至搬屋，新居所只係住咗幾個月，點解佢會走得咁突然呢？

錢寶芬喺社交平台解釋，指自己其實一直都冇決心離開香港，就算舊年兒子打算幫佢申請BNO Visa，佢都一口回絕，事關佢實在唔想走囉。之不過，隨住時日嘅推移，兒子所就讀嘅學校將於4月舉行畢業禮，加上英國防疫政策有所放寬，即使未接種疫苗仍可入境，令佢不禁想到回港需面對隔離同打針等種種嚴苛嘅防疫措施，同埋佢早前「踢保」，擔心出境後回港會有手尾跟，於是佢把心一橫，索性喺英國做寓公，遲啲再申請5+1留低喎。

講起今次出走，錢寶芬曾因證件問題而惴惴不安。事關佢嘅特區護照剛剛過咗期，至於BNO護照，港府已拒絕承認為旅遊及身份證明文件。雖然目的地係英國，但到底手持BNO護照能否順利登機呢？實在不無疑問。於是佢嗱嗱臨走去續領特區護照，無謂冒險咁話。