政Whats噏：指地震通报只能事后发出　香港天文台遭台湾气象局打脸

上周一(14日)凌晨，唔少睡梦中嘅市民因地震而吓醒。事后不但港府耗资1.5亿港元研发嘅“紧急警示系统”挨轰，香港天文台亦成为众矢之的，遭网民质疑点解冇发出地震预警。当时天文台就话以现时嘅科技水平，无可能喺地震发生前作出预警。之不过，呢个言犹在耳嘅解释，今日(23日)就遭到台湾气象局打脸嘞。

话说今朝凌晨，台湾花莲近海发生地震，当地民众瞬间惊醒之馀，亦有好多人话警报发出后约10秒先至感到建物摇晃嘅震感，大赞气象局嘅警报比地震仲要快！对比上周香港天文台要喺地震后先至发出通报，台港两地嘅预测地震水平可谓高下立见。

天文台前台长岑智明，上周反驳市民对文天台嘅质疑，就指破坏力强嘅地震波（S-wave）速度较纵波 (P-wave)稍慢，因此某啲国家嘅气象部门系可以同地震波斗快，提供地震前10秒嘅预警。既然岑智明都讲得出人家点样提供地震预警，点解香港天文台唔去参考做法呢？虽则话预警时间较为短促，但不时面对地震嘅台湾网民就话“提早10秒给推，很够时间躲了”。