政Whats噏：疫下長者成高危　梁熙指統籌不一難求助

年紀大機器壞，疫情下屬高危一族嘅老友記，對醫療需求更顯迫切。議員梁熙指，現時好多檢疫中心變成社區隔離設施，但奈何醫護人手緊絀，加上當局統籌唔統一，都令到好多長者難以求助。

梁熙今日(25日)出席一個30位立法會議員到全港各區，向獨居長者派發抗疫物資嘅活動，期間佢提到依家有好多確診長者，要好耐時間先至睇到醫生，令到檢查等醫療程序出現滯後；而當局嘅查詢平台同熱線都唔夠統一，令病人查詢時出現困難，包括攞藥等程序亦都要兜兜轉轉，令病人無所適從。

身兼行會成員嘅議員張國鈞亦都有參與活動，佢話染疫後唔喺抖幾日就無事，因為一旦確診都會影響屋企人同老人家等。至於議員郭偉強亦都認為疫情對長者嘅威脅好大，希望街坊互相照顧，佢亦都指有長者仲未識自己用檢測包，大大失去保護能力。