政Whats噏：流亡美國獲庇護　許穎婷：餘生在外度過

自《港區國安法》頒布後，唔少社運人士選擇出走或流亡海外。前年12月向外界聲稱已離開香港嘅前學民思潮成員許穎婷，尋日(14日)喺社交網站貼文，指自己已獲得美國政府正式發出政治庇護，佢又話無想過自己嘅申請可以喺半年內獲批，為真正離開香港嘅事實感到無比沉重，並意識到自己嘅餘生，真係要在外度過。

許穎婷話喺去年9月，佢提出受到港府政治迫害嘅陳述得到美國政府嘅信納，正式向佢發出政治庇護嘅身份。當收到美國政府向佢發出有關決定嘅信函，許穎婷話感到驚訝，事關美國嘅政治庇護從申請到批出，短則一年、長至七年都有，實在無諗過自己嘅申請竟然喺短短半年內獲批，成為首位得到美國政治庇護嘅香港倡議者。但佢又隨即意識到自己餘生真係要在外度過，為真正離開香港嘅事實感到無比沉重。

宣布流亡海外至今已經一年半嘅許穎婷，指離開香港之後嘅日子，的而且確正經歷不一樣嘅生活。加上自我嘅期許、大眾對流亡倡議者嘅期望、各個政圈內嘅政治問題、以及人生變化，都令佢時刻感到無力同困擾。由起初滿懷抱負，其後開始懷疑人生、意志漸被消磨，且要面對身心健康嘅問題，惟有喺某啲範疇上作出取捨，暫時離開公眾視線，並分配更多時間照顧自己同重視嘅人身上。

講起政治庇護申請獲批，許穎婷形容昔日嘅香港人眼中，尋求政治庇護就好似隔洋觀看第三世界嘅戰火咁遙遠，但勢估唔到如今竟變常態，佢又話香港人如今成為流散民族，且要面對認清目標、同埋跨過矛盾等諸多考驗。佢話有時會嘗試好好地習慣喺美國嘅生活，但每當回望香港嘅現實，當中嘅抽離感就令佢倍覺痛苦。

許穎婷話自己好努力咁去捉緊對香港嘅記憶同感受，但卻無法阻止呢個城市喺腦海中淡化、變得愈來愈虛幻。雖然佢擔心香港終究會隨着記憶褪色而消失，但佢話過去三年嘅海外倡議從未有停步，至今亦然，未來將繼續喺社交影片頻道及平台交代工作方向。至於前民間外交網絡發言人張崑陽去年8月亦在社交網站宣布流亡美國，當時亦指正申請政治庇護。