政Whats噏：陳祖恒再次做爸爸　第4胎喜獲千金

立法會大會今日(27日)暌違3個月舉行實體會議，原本有3個仔仔嘅紡織及製衣界議員陳祖恒踏入會議廳，就接受到眾議員恭賀，原來係再次做爸爸，喺今朝迎來第4個小朋友。

陳表示，太太尋晚(26日)入院，今早分娩，順利誕下第4胎，係囡囡嚟嘅，自己則今朝見太太安全後喺醫院趕過來立法會開會，一班議員同事得知後都向佢恭賀，佢又形容醫院嘅防疫措施都做得相當充足。

再次做爸爸，佢形容好開心，笑言頭3個都係仔仔，而且慢慢長大，頭2個年齡相近，約7、8歲，第3個就嚟2歲，2個哥哥都想要個細細佬陪細佬，夫妻2人就開始計劃生第4胎，點知無幾耐就有咗，佢話係上天幫佢哋做咗決定，唔使諗咁多！至於今次係咪追囡成功？佢話無話一定要生囡，生仔生囡一樣咁開心！