政Whats噏:油尖旺頻現鼠蹤 或有新冠病毒? 區議員去信食環查詢

20220506
東網電視
更多新聞短片
油尖旺區係鼠患重災區。
政府早前宣布執行「滅鼠令」撲殺倉鼠及小型動物,惹來社會廣泛批評,更有動物組織促政府收回「成命」,指出寵物傳人嘅風險極低。而油尖旺區區議員李偉峰日前亦去信食環署,要求交代當區捉嘅老鼠有無染疫,署方就話一直有做老鼠樣本檢驗,指未有實質科學證據證明老鼠可傳播2019冠狀病毒比人類。
油尖旺區係鼠患重災區,當區有好多街市、熟食小販、舊樓等,令老鼠四出「搵食」。所以李偉峰就透過油尖旺區議會嘅食物環境衞生及工務委員會,了解當區鼠患問題,早前亦去信食環署,問及最近2年捕獲老鼠嘅數量,以及滅鼠方式,甚至係捉到嘅老鼠有無染疫,並希望食環署喺下周二(10日)出席會議。
署方其後透過書面回應,指署方喺區內進行一星期最少3次嘅防治蟲鼠工作,包括採取預防措施以斷絕老鼠嘅食物來源、清除老鼠嘅藏匿點及以水泥、金屬網或其他充填物堵塞老鼠來往嘅通道。而過去2年,署方喺油尖及旺角區共捕獲8008隻活鼠及收集13544隻死鼠屍體。而署方亦強調自去年2月起,署方按香港大學嘅要求,提供老鼠樣本作2019冠狀病毒檢驗,現時仍未有實質科學證據證明老鼠可傳播2019冠狀病毒比人類。