政Whats噏:巿民口腔被歧視? 田北辰批醫管局牙科服務不足

2022年05月13日 21:08
東網電視
更多新聞短片
田北辰指醫管局指診所牙科服務欠奉,要求政府唔好再「歧視個口」。
牙痛慘過大病,要活得開心就要有健康嘅牙齒。之不過,唔少人嘅口腔問題未得到妥善照顧。議員田北辰指出,市民嘅眼、耳、鼻同喉嚨有唔妥,可以去醫管局診所睇醫生,但牙科專科或者口腔護理嘅服務就十分欠缺,反問依家係咪歧視市民個口腔喎。
立法會衞生事務委員會今日(13日)開會,其中討論到牙科護理服務,田北辰發言指出,現時醫管局嘅牙科專科或口腔護理嘅服務非常不足,政府雖有為長者提供牙科護理服務嘅計劃,但呢啲計劃都有其申請門檻或限制,並非每個長者都可受惠;而即使符合申請資格,但往往面對長時間輪候,由於私家牙醫收費高昂,唔少長者惟有默默忍受,苦不堪言!田認為最主要原因係人手短缺,指上一屆立法會已經通過咗海外醫生條例,希望政府可以考慮引入埋海外牙醫,增加人手。
食物及衞生局副局長徐德義回應話,引入海外牙醫係一個好重大嘅政策方向,需要時間討論;又話醫管局都有牙醫幫手處理住院病人嘅口腔問題,而並非完全無牙科服務。田唔滿意徐嘅答覆,指醫管局即使有牙科服務,但明顯唔足夠,否則大家都唔會「牙痛咁聲」啦。