政Whats噏:投票支持小學校長加薪 朱國強疑惹利益衝突

2022年05月13日 21:54
東網電視
更多新聞短片
朱國強疑惹利益衝突。
立法會規矩繁多,「新丁」議員如果一時拿捏唔好,隨時惹上利益衝突。事緣上周五(6日)舉行嘅教育事務委員會,當時正表決有關公營小學校長薪酬嘅調整議題,包括上調公營小學校長嘅起薪及頂薪點,小學校長起薪點增加最多2萬港元,而頂薪點就提升至每月10萬港元以上。本身喺資助小學校長嘅教育界立法會議員朱國強,就投咗贊成票。之不過,事件餘波未了,有指議員其實唔可以就有直接金錢利益嘅任何議題表決,唔通上次以13票贊成通過嘅表決就此無效?
根據《議事規則》列明,喺立法會或任何委員會或小組委員會會議上,議員唔可以就其有直接金錢利益的任何議題表決,除非該議員嘅利益屬香港全體或某部分市民同樣享有,又或議員所表決嘅事宜喺政府政策。而當時朱國強喺首次發言前申報利益,及後表決時投下贊成票。佢之後回覆傳媒,指表決前曾問過秘書處,對方只喺話須申報利益,無話唔可以投票。指自己喺業界代表,投贊成票好合理,況且議題關乎全港校長待遇,並非只涉其個人利益。最終議案以13票贊成、1票反對及2票棄權通過。
之不過,亦有聲音指呢種情況應避席,唔可以投票,其中議事規則委員會主席謝偉俊回覆傳媒,就指如果有議員或公眾投訴,立法會議員個人利益監察委員會就要調查。而議員葉劉淑儀亦都指佢事後問過秘書處,對方就話呢種情況唔應該投票,或者需要徵詢立法會法律顧問意見。而委員會主席梁美芬就指呢個屬「踩界個案」。根據《議事規則》,如果有議員真喺違例,可由立法會藉訓誡或譴責,或暫停職務或權利嘅議案加以處分,至於最終誰是誰非,就要睇法律意見點樣解釋喇!