政Whats噏：見長者及單親劏房戶困境　黎棟國感難過

公屋輪候時間創新高要等6.1年，同以前話3年上樓超過一倍。雖然政府搞過渡性房屋，但都救唔到火。議員黎棟國日前就去探過上水嘅劏房戶，見到啲住戶嘅困境，坦言覺得好難過。

黎棟國首先去咗幢唐樓，嗰個單位本來都已經係細，但被劏成7間劏房，每間劏房只有不足50呎，放到一張塞滿雜物嘅碌架床之外，根本就放唔到其他嘢，走廊亦好狹窄，由於門上嘅橫樑，佢幾乎要彎低腰先入到去，當見到行動不便嘅婆婆坐喺床上，諗到對方連出入都有困難，見到咁嘅情況亦感到難過。

跟住佢又去探咗一個單親家庭，嗰位女士同囝囝住喺不足80呎嘅劏房。媽媽本來有工作，但因疫情關係，社區嘅暫託服務停頓，由於要照顧囝囝，無法上班，生計大受影響，連交租都成問題。

長者且單親家庭嘅困境，都係深層次問題未解決所致，所以佢話會繼續催促政府加快興建公營房屋，仲要其他部門給予基層市民更多嘅支援。