政Whats噏：研架構重組委員會　44議員報名爆晒燈

政府架構重組方案即將提交立法會審議，研究有關事宜嘅小組委員會喺今日(17)下晝5點截止報名，總共有44名議員，簡直係爆晒燈，由於小組委員會嘅人數上限為15人，再加上有13名議員已經按名單獲分配名額加入，其餘31名議員跌入超額名單，邊2個議員係幸運兒攞到個位呢？佢哋就係張欣宇同劉智鵬嘞！

報名加入小組委員會嘅44名議員當中，以G19、即謝偉銓名單報名人數最多，有14人，但佢哋可分到嘅配額只有3個，「孫東」名單有10人，配額只得2個；其他名單，例如麥美娟、盧偉國同張宇人等報名人數都超出配額，只有陳克勤嘅名單啱啱好，3個夠數。至於冇加入任何名單嘅4名議員，只有狄志遠報咗名。

而透過名單配額加入小組嘅有13名議員，包括林健鋒、葉劉淑儀、易志明、廖長江、盧偉國、吳秋北、林琳、姚柏良、梁毓偉、陳勇、楊永杰同梁文廣等。