政Whats噏：創新辦民政署公函都寫錯　被嘲自己寫信畀自己

信函要依格式，就算寫電郵都唔例外，至於經常同外界書信往來嘅政府部門，發公函應該係手到拿來，但竟然都甩轆，認真抵鬧。

話說政府早前推出臨時失業援助計劃，為疫情下手停口停嘅打工仔提供紓困錢一萬元。呢項計劃係由政策創新與統籌辦事處同民政事務總署負責，申請亦已經結束，但就惹起唔少爭議。有勞工界背景嘅議員陸頌雄今日(18日)喺社交平台上載電郵截圖，內容係回覆臨時失業支援計劃嘅申請人。而陸就指出呢封電郵唔應該以「此致」嚟收束內文，話咁寫嘅意思，即係「此」信函「致」某位收信人，然而下款並非申請人，而係臨時失業支援計劃，咁豈不是自己寫信畀自己？

究竟創新辦同民政總署係咪寫錯 ，隨即惹起熱議。有網友話收到嘅電郵都係咁，另有網友認同「此致」之後，應該係收信嘅機構或人名，仲叫有關部門反省；亦有網友幫腔，話可能係電腦格式移咗位啫！一人一句唔係辦法，陸索性上載教育局網站嘅公函範本，講明「此致」之後係收信人職銜同姓名。

竟然咁都犯錯，創新辦同民政總署真係要反省下啦。猶其好多市民依家都好火，事關好多申請人都唔批一萬蚊，但冇上訴機制，唔少議員連日嚟都炮轟政府做法不當，甚至建議當局延長申請人補交資料嘅時間。唔知相關部門有冇聽入耳呢？