政Whats噏：頻爆內訌兼有黨高層出走　民主黨減中委人數避風險

舊年因為參唔參選立法會換屆選舉嘅問題，引發民主黨(白鴿黨)內訌，副主席李永達同同前議員單仲偕更相繼離港去咗英、美，黨內立立亂。該黨將喺年底改選領導層，目前中委會唔計正副主席共有14名委員，為減低風險，中委人數會減至10至12人。

該黨早前舉行集思會商討未來路向，對於將來會否參選，該黨主席羅健熙喺電視節目中話喺現行嘅區議會制度下，佢睇唔到該黨點解突然會由參選改為唔參選；至於立法會選舉，佢一直以來嘅講法，都係上一次黨冇人參選係單次嘅決定，喺嗰次選舉嘅事，黨嘅選舉都唔會因上次冇人參選，以後就會排除參選。

對於該黨年底改選領導層，目前中委會唔計正副主席共有14名委員，佢話為減低風險，中委人數會減至10至12人，如無意外佢亦會爭取連任。

佢又話雖然未獲候任特首約見，但該黨亦會遞交意見書，又話只要政府多行一步，見到政府比較多吸納唔同聲音同意見，而唔係將反對聲音、非我族類就唔理會，佢相信市民會睇到。