政Whats噏:羅冠聰在美獲頒榮譽博士 網民斥:走佬令兄弟心碎

2022年05月22日 14:14
東網電視
更多新聞短片
羅冠聰獲美國一所學院頒授榮譽博士。
多宗案件在身、被香港警方通緝嘅前香港眾志常委羅冠聰,獲美國Washington & Jefferson College頒授榮譽博士學位,有網民坦言見到佢就感到難過,事關諗起佢嘅戰友、前眾志秘書長黃之鋒仲還押緊,更有個別嘅網民仲翻舊帳話佢走佬,令兄弟心碎。
話時話,佢當年做立法會議員,雖然最終被取消資格(DQ),花咗唔少時間,其後又因重奪俗稱「公民廣場」嘅政府總部東翼前地一案而被判監,搞到喺嶺南大學文化研究系讀足6年先畢業,之後喺耶魯讀碩士,但兩間大學嘅畢業禮都冇出席。
佢今日喺社交平台貼文,話自己獲頒榮譽博士學位後,仲勸喻其他人唔好叫佢做「博士」,事關呢個只係一個榮譽性質嘅學位。雖則唔少網友為佢高興,但亦有網民留言話好多年輕人喺香港坐監,仲翻舊帳「又話齊上齊落不割?自己走佬!兄弟心碎。」另有網民留言話見到佢本來係開心事,但諗起黃之鋒就感到難過。黃之鋒因多宗案件被裁定罪成及判監,而相關嘅刑期已屆滿,但佢因參與前年民主派初選,涉違《港區國安法》,依家被還押。