政Whats噏:公僕加薪建議離地 陳健波促全面檢討薪酬機制

2022年05月22日 18:22
東網電視
更多新聞短片
薪酬趨勢調查結果早幾日出爐,低層同中層分別加薪2.04%、4.55%,高層加薪高達7.26%,高層嘅加幅遠超通脹。保險界議員陳健波話公務員加薪幾乎每年都有爭議,反映現時嘅機制有問題,建議下屆政府必須作出全面檢討,兼且認同要落實「關鍵績效指標(KPI)」,提升政府效率。
陳健波日前喺社交平台上載咗一段短片,話市民對公務員加薪有好大意見,又引述有人力資源公司形容薪酬趨勢調查嘅結果驚人,由於唔少行業都經營果難,甚至倒閉,所以調查嘅結困果係離地嘅。佢直指薪酬趨勢調查嘅數字係滯後嘅,事關冇反映到第5波新冠肺炎疫情嘅影響,再加上私人市場往往論功行賞,表現好嘅員工加幅較大、有花紅,表現一段嘅就加幅較少,甚至凍薪,而政府就只按公務員職級一刀切處理,所以薪酬趨勢指標只可以作為參考,政府同時亦要考慮聘請最多人嘅中小企情況、經濟情況同政府財政狀況等等
實際上,多個公務員團體對調查結果亦有唔同意見,陳健波話公務員薪酬幾乎每年都有爭議,某程度反映呢個制度有根本問題,受影響嘅更唔止係公務員,仲有公營機構等,所以下屆政府應該全面檢討薪酬嘅問題,甚至落實KPI,而呢個係最有效推進工作嘅方法,公務員想加人工,就要做實事。