政Whats噏:區議員姚鈞豪仍未宣誓 民政局拖7個月冇行動

2022年05月22日 19:27
東網電視
更多新聞短片
姚鈞豪至今仍未宣誓。
喺2019年嘅區議會選舉,泛民主派喺區議會取得優勢,但係2020年就任後就亂象頻生,更被炮轟淪為「黑暴基地」。為咗撥亂反正,政府早喺舊年年5月刊憲規定18區區議員須宣誓擁護《基本法》、效忠特區,但1年過去,至今仍有得做區議員嘅都理應過咗政府呢關,成功通過宣誓。但竟然仲有1個區議員拖逾7個月,迄今仍未宣誓,究竟民政事務局係咪掛萬漏一?呢屆政府任期仲有唔夠6個禮拜,係咪要拖到下屆政府先處理?
講緊嗰個區議員係大埔區嘅姚鈞豪,佢被指前年3月喺大埔挑釁同用雷射筆照射便衣警員,被控參與非法集結、無牌管有無線通訊器具等罪名,舊年8月下旬被判處監禁3個月。因入獄嘅緣故,佢未能出席宣誓儀式,之後喺獄中收到宣誓通知,但宣誓又突然被取消。當時佢曾直指當局喺宣誓當日先再收到通知話宣誓臨時取消,又冇解釋原因,批評局方「彈出又彈入」,並唔係好似局方所講係莊嚴地對待宣誓。
呢一次取消就至今都冇再收到要宣誓嘅消息啦!姚鈞豪喺舊年10月底刑滿出獄,但據佢所講,政府至今冇通知佢要進行宣誓。佢又話宣誓理應係當局作主動,但依家都冇人聯絡佢。佢亦曾經嘗試主動聯絡民政事務總署,但都冇任何結果,對此感到疑惑。至於宣誓毫無進展,佢話會繼續履行區議員職務,做得一日得一日。
東網曾向民政事務局查詢有關事宜,發言人只係回應話政府係按《2021年公職(參選及任職(雜項修訂)條例》相關要求落實有關宣誓規定,佢哋冇其他補充。
點解姚鈞豪出獄後,當局都冇安排佢宣誓?相隔2個月,直至今年1月初,時任嘅民政局局長徐英偉因「洪門宴」事件被停職,喺1月底辭職,當時第5波疫情大爆發,可能要處理疫情、局長又要換人,忙亂下都唔得閒理。之但係只係處理1個區議員宣誓都要拖拖拉拉逾半年,現屆政府任期下月底屆滿,唔通署理局長陳積志諗住等下屆政府接手?