政Whats噏：本地研發總開支增長緩慢　倘要達標政府話「甚具挑戰」

雖然政府力推「智慧城市」，但一講到創新科技發展方面，就交唔出令人滿意嘅成績表。有議員喺今日(1日)嘅立法會大會上提出口頭質詢，關注本地研發總開支所佔本地生產總值嘅比率，以及多年來大幅落後於華南城市嘅現象。而政府嘅回應就係「甚具挑戰」，至於理由，就不離社會暴亂同疫情呢兩個好使好用嘅答案。

話說2017年嘅政府施政報告曾訂下目標，要喺今屆政府任期結束前，將本地研發總開支相對本地生產總值比率升至1.5%，科技創新界議員邱達根要求政府交代落實狀況，又問到政府會否參考外地經驗，全方位吸引更多私人機構或工商企業參與投資，同埋推動科研在港進行。

創新及科技局局長薛永恒就回應話，香港嘅本地研發總開支，由2017年213億元增加到2020年265億元。而同期總開支佔本地生產總值嘅比率，則由0.8%增加至2020年嘅0.99%，相信2022年要達致1.5%嘅目標「甚具挑戰」，理由係香港近年飽受社會暴亂、愈趨複雜嘅地緣政治，同埋過去兩年嘅疫情衝擊。至於私人機構參與，薛承認對於科研發展十分重要，提供超級稅務優惠等可協助有關政策嘅推行，而截至今年4月底，有181宗就合資格研發活動開支提出嘅扣稅申請，總值約25.1億元。但佢又提到過去一段時間嘅社會不穩同接踵而至嘅疫情，影響私人機構對科研嘅投入，以致整個創科嘅發展形勢都弱咗。

議員梁毓偉就關注香港年輕學者及創業者與內地嘅交流進度。議員陸頌雄就話除咗政府資本同企業援助，唔少市民都想參與創科投資，但現時市場上嘅創投基金門檻高，風險亦高，問政府會否推出類似綠色債券嘅創投債券，為市民帶來長期同穩定嘅收益。

薛永恒就指內地已推動好多惠港政策，包括推動兩地人才合作，當局亦有基金資助大學學者。佢又話香港目前係全球第2大嘅生物科技集資中心，集資過程是開放給不同市民參與，對於設立創科債券持開放態度。