政Whats噏:陸頌雄甩轆 要求唔存在嘅會議傾停電事件

2022年06月23日 16:30
東網電視
更多新聞短片
陸頌雄要求下周一相關委員會召開嘅會議討論大停電事件。
屯門、元朗同天水圍日前發生大規模停電,議員陸頌雄今日(23日)去信立法會經濟發展事務委員會,要求討論周二晚電纜橋大火引發嘅大停電事件。但翻查資料發現,原來下周一(27日)嘅會議一早就改咗期,陸發信畀唔存在嘅會議,咁點討論呀?不過,改時間係咪都有機會討論?委員會主席吳永嘉就話未必,會要求政府作書面回覆,再睇情況會否加入議程啦!
陸頌雄喺信中提到,當日有多達50萬名市民受斷電影響,期間港鐵停駛,部分地區流動通訊及供水中斷,甚至醫院服務亦受阻,事件規模之大,影響之廣係本港數十年來罕見。佢要求下周一嘅會議討論事件,同時要求政府及中電派代表出席,徹查事件原因並盡快提交調查報告,為因停電蒙受損失嘅居民及商戶提供合理補償,並檢視現有設施的安全性、巡查機制、維修保養程序同應急方案。
但事實上,主席吳永嘉早前已作出指示,事務委員會下次會議已由原定嘅27日改到下月4日。換言之,個會議一早唔存在,根本無法討論有關事項。再問返吳永嘉下月4日嘅會議又會否將此納入議程討論?吳指當日已有原定議程,未必會就停電展開討論,形容事件已經發生,並非有迫切性,會先叫政府作書面回覆,之後再睇情況係咪需要討論。