政Whats噏：遭網民改字幕惡搞　岑智明貼文澄清

網絡世界，有圖唔一定有真相。天文台前台長岑智明嘅社交專頁，尋日(22日)上載有關佢接受訪問嘅梗圖，而貼文就話「知道新界西北仲有好多朋友冇電，之不過我冇開冷氣，唔好屈我。」睇嚟佢好似蒙冤受屈咁喎，到底發生乜嘢事呢？

話說前晩新界西北地區因元朗一條電纜橋起火而導致大停電，適逢炎炎夏日，受影響嘅居民無奈忍受一個酷熱嘅晚上。而稍後網絡就流傳一幅梗圖，內容係岑智明接受訪問並配上字幕「你嗰邊停電啫」、「我呢邊開行冷氣喎」！

儘管梗圖嘅字幕令人莞爾，但對於受停電影響嘅居民，就無疑係講緊風涼話啦！但最大問題係，岑智明並無講過呢番話啊！其實原圖係佢接受訪問時話「你嗰邊大雨啫」、「我呢邊冇喎」。到底係邊個咁手痕惡搞呢？岑智明似乎並無深究，但就有網民留言批評，話咁做好無品囉。