政Whats噏:提問已通過議案 劉國勳面懵

20220624
東網電視
更多新聞短片
當官員指出有關嘅道路改善工程項目已於前日通過,劉國勳先至知道自己搞錯咗。
立法會工務小組委員會今早(24日)召開3節會議,先討論擴闊福亨村路工程同富寶花園至西沙路升降機及行人通道系統。但議員劉國勳發問時,就問咗前日(22日)已經通過咗嘅稔灣路(北)與深灣路改善工程,唔知呢排喺咪跟進停電事件,搞到忙中有錯呢?
話說劉國勳提問時,指未來發展北部或者流浮山下白泥一帶,稔灣路同深灣路呢條道路都十分之重要,因此詢問當局會唔會考慮埋北部都會嘅發展擺埋落去,仲指多次落區,認為交通都成日發生險象。劉講完之後約莫有10秒,都未有官員回答,其後路政署署長陳派明打破沉默,指議案前日已經通過咗喇,稍後會去財委會申請撥款。劉呢個時候就知自己搞錯咗,話唔緊要啦,多謝晒。會議餘下嘅時間劉再無發言。
會後劉國勳解釋,因忙於跟進大停電以及恢復供電事宜,無法抽身出席前日嘅工務小組會議。之不過,佢仍然關注稔灣路與深灣路嘅改善工程,所以想趁今日開會嘅機會問番路政署署長。對於提問已通過嘅議案,自己亦有喺會上講唔好意思。