政Whats噏:張國鈞麥美娟入熱廚房 孖頭地辦點收科?

2022年06月26日 13:08
東網電視
更多新聞短片
喺漁灣邨嘅地辦,梁熙已用紙遮咗張國鈞個名。
張國鈞同麥美娟早前就告別選委界議員身份,即將擔任律政司副司長同民政及青年事務局局長,照道理佢哋牽涉政黨嘅嘢都要避忌。之不過,張同麥早前就分別同港島東梁熙及金融界嘅陳振英,開設「孖頭」地區辦事處,而且已經街知巷聞,唔知佢哋將用咩形式處理呢?
梁熙同張國鈞2人喺漁灣邨嘅聯合辦事處於本月11日都正式啟用,佢哋本屬同一政黨,但張日前指為方便工作,先退該黨副主席,過兩日仲索性退埋黨。而梁熙接受我哋查詢時話會將地辦上有關張國鈞嘅名遮住,而議員可租用辦事處總面積亦都無超過,佢又話自己半年前已經開始喺地辦工作,影響都唔大,團隊亦都好有經驗。話咁快,佢今日(26日)就將「另一半」遮住咗嘞,仲話間接促成咗佢首個以梁熙個人名義設立嘅地辦喎。
至於麥美娟同陳振英喺6月初,正式宣布位於青衣長安邨嘅聯合辦事處啟用,當時仲為長者贈送愛心飯、水果、口罩等物資。陳振英就同我哋講,由於麥美娟當時以工會名義簽約,所以其黨友、新界西南議員陳穎欣會幫手接替,到時只要去房署重新簽番個名就可以轉讓。陳振英亦指相信影響不大,如街坊有任何求助或查詢,都歡迎繼續搵佢哋幫手。據了解,陳穎欣仲會接埋另外5個原屬麥美娟嘅地辦,仲話其中一個已開張嘅地辦,遲啲會搵番麥美娟嚟開幕禮剪綵添!