政Whats噏：海鮮舫生死在你手　可以咁...

滿載港人回憶嘅珍寶海鮮舫早前被拖離港，話喺南海遭遇風浪而沉沒，竟一別成永訣，點知隔咗兩日又峰迴路轉，話仍然喺西沙群島一帶水域海面，即係仲有一線生機，市民個心真係又落又上咁。究竟海鮮舫嘅後續發展係點？暫時唔知，但係市民竟然可以阻止沉船。

喺現實中，點樣去救喺大海中嘅海鮮舫，普通市民都無能為力，但喺虛擬世界中，無可能嘅事都變有可能。話說黃大仙前區議員岑宇軒就寫咗個網頁，整咗個「再見海鮮舫」嘅小遊戲出嚟，用簡單嘅操作，帶領海鮮舫避過風暴等危險，阻止沉船嘅結局。

呢個遊戲係計時嘅，當然愈長時間，即係沉船嘅機會愈細喇！有網友玩過之後亦有留言，個別網友話好難，最多只係維持到20幾秒，而岑宇軒亦教路，話用手機玩可以去到1分鐘左右，用電腦滑鼠會再避得靈活啲嘅。唔知呢個遊戲可唔可以填補到市民嘅失落感呢？