政Whats噏:江玉歡斥康文署招數似化妝 鎮唔住炒場黨

20220626
東網電視
更多新聞短片
炒場黨猖獗,市民一場難求。
雖然康樂及文化事務署不停出招遏止炒場黨,但係呢啲招數仍然有好多缺口,反而養肥咗佢哋。打開羽毛球嘅議員江玉歡(Doreen)亦鬧爆政府嘅招數,似係化吓妝咁,根本鎮唔住班炒場黨。
Doreen今日(26日)喺社交平台貼文話20幾年前學打羽毛球,但近幾年就打少咗,但阿仔叫到,佢都會落場搓下波。期間亦見到康文署外判職員喺中段時間查身份證,佢覺得應該係仲有人炒場嘞!仲話依家炒場黨惟有陪坐,見招拆招,賺多一筆,但問題冇解決過。佢批評政府點解永遠唔能夠根治問題,亦唔係全心投入去解決,只係做一半或表面化吓妝,反問又點可以鎮得住班炒場黨呢?
歸根究柢,都係來自供求問題。Doreen反問政府有冇諗過開放學校運動場畀公眾使用,增加場地供應?事關大部分學校都係公帑興建,點解星期六、日、假期同暑假唔開放畀公眾,令公共資源得以善用?佢認為政府要諗下喺疫情過後,開放學校運動場畀公眾使用,紓緩場地嚴重不足嘅問題。