政Whats噏：陳帆探基層短片　字幕現「獨立」令人愕然

本屆政府任期即將完結，但臨尾都「甩轆」喎。話說運輸及房屋局嘅社交專頁「運房點線面」出咗新影片，局長陳帆落區探望公屋住戶，但字幕就出現「五星紅旗五個，這代表我要獨立」嘅字眼。搞邊科呢？

其實係受訪公屋住戶話要將自製襟章送畀陳帆，跟住就介紹襟章上面嘅五星紅旗代表佢一定要獨立、真係要做嘢。之不過，顯示為書面語嘅字幕「我真的要工作」就延後喺下一秒出現。差一句，意思完全唔同，難怪會打咗個突，喺呢啲位真係要小心呀！好易令人誤解。東網曾為此聯絡運房局，惟未獲回覆。

話說陳帆喺2017年7月上任，之後曾出席基層市民居民大會，當時呢位受訪嘅劏房戶就坐喺陳隔籬，當時陳談及劏房環境嘅時候仲一度哽咽落淚，話生活環境「的確令人傷心」，難以令人接受。事隔5年後再探返呢位市民，原來佢喺2018年已成功上到公屋喇！