政Whats噏：張國鈞將擔任副司長　告別立會拍片遊花園

即將擔任律政司副司長嘅議員張國鈞(Horace)，上任前一日喺社交平台上載影片，介紹佢喺議會內嘅大小事，仲帶大家「遊花園」，走遍立法會綜合大樓不同角落。

Horace先介紹自己嘅議員辦公室，話辦公室較為輕鬆，亦有唔少書籍，佢每次落樓發言之前都可以喺「迷你圖書館」引經據典。緊接就帶大家去到立法會5樓平台花園，享受風景之餘，又話呢個位睇煙花最好。

去到另一個Horace政治生涯中重要嘅地方，即係立法會議事廳。佢有感而發咁話，議事廳佔據佢大部分時間，期間見證5年動盪時刻。佢仲提醒各位議員，唔好喺議事廳玩手機呀，一定會畀人影到咁話。喺立法會綜合大樓遊花園之後，佢都話希望日後可以另一個身份，再返嚟議事廳為香港服務。