政Whats噏：鍾國斌破戒　1晚飲7枝1997靚酒

間唔中喺社交平台都會見到，紡織及製衣界前議員鍾國斌(Felix)貼文同上載啲相，尤其係飲靚酒嘅相，近日佢又上載咗張相，竟然係一晚飲咗7枝靚酒。唔少網友睇見都起哄，但有前議員同事竟反問佢：「你不是戒酒嗎？」

點解咁高興呀？張相係尋晚(6月30日)映嘅，呢7枝酒全部都係同一年份，係1997呀！Felix仲話好耐無開過咁多枝同一個年份嘅酒嚟飲。相信大家都估到喇，事關香港喺1997年回歸，今日(7月1日)25周年。唔怪之得咁盡興喇！

Felix係飲得之人！仲記得幾年前，佢參加一個聖誕派對，唔單止玩足全場，仲力壓一眾年輕對手，成為啤酒競飲大賽冠軍，真係寶刀未老！但係啲網友見到佢今次張相，第一個反應係問佢：「你不是戒酒嗎？」仲有佢過去嘅議會同事、會計界前議員梁繼昌都係問，但係佢就冇回應點解破戒喎。吖！究竟佢點解要戒酒呢？