政Whats噏：劉慧卿飛德國放假　貼文強調「會回來的 」

隨住多個國家陸續放寬、或取消入境防疫措施，渴望去旅行嘅港人又有機會出門啦。民主黨前主席、前議員劉慧卿今日(2日)現身機場並拖住個大型旅行喼，話要去德國放假喎。跟住佢就話感謝前議員同事梁繼昌，喺風雨中送佢去機場。劉慧卿出門旅行嘅消息經社交平台傳出之後，好多人留言祝佢旅途愉快，但亦有人質疑佢係咪「走路(佬)」。

其實送別劉慧卿之後，梁繼昌都有用英文喺社交平台留言，透露劉月尾就會回港；而劉嘅黨友兼前議員同事黃碧雲，就祝佢有一個愉快同安全嘅旅程；前議員邵家臻就留言話「善待自己，好好休息」。

可能劉慧卿見到有人留言問佢「去邊度游埠？仲返吾返港？」於是佢再度發出貼文，用中、英文交代自己剛上飛機，會先去曼谷，繼而轉機前往慕尼黑，仲強調話「會回來的」，又上載佢喺機艙內揮手嘅照片。之不過，張相到底係邊個幫佢影呢？莫非佢今次出門，並非孤身一人？