政Whats噏:助滯留客被指為攞分嬲爆 梁文廣要巴士職員收回言論

2022年07月03日 19:32
東網電視
更多新聞短片
尋日傍晚有幾十名市民滯留大橋口岸關口。
呢幾日香港真係風風火火,事關又打風,元朗阜街大廈天台起火。而議員梁文廣就收到市民求助冇金巴搭去珠海,在港珠澳大橋關口滯留,雖然事件終於得到解決,但就谷到一肚氣,事關有巴士公司嘅職員竟然話啲議員嚟協調係為攞分,簡直嬲爆,即刻叫嗰個職員收返咁嘅講法。
話說尋日(2日)打緊8號風球期間,包括梁文廣在內嘅多名地區直選議員,收到30個求助電話,話因為打風嘅關係,冇巴士搭去珠海而滯留,於是佢哋就急急腳去到現場協調。梁文廣仲做Live,見到現場有幾十名市民,而因為大雨,佢副眼鏡都布滿水點。過咗幾個鐘頭,佢再做Live,話經過運輸及物流局同金巴方面嘅斡旋下,滯留嘅市民可以分乘兩部巴士去珠海。雖則件事已經解決,但佢就話當中發生幾段插曲。
其中一段插曲係非常唔愉快嘅。佢話同金巴職員有啲口角,原因係職員話啲議員係為咗攞分而嚟嘅,佢聽到呢句說話就好嬲,話嗰時大風大雨,自己成身由乾變濕,又由濕變乾,再加上滯留嘅市民未必係佢哋所屬選區嘅選民,有啲甚至唔係香港市民,竟然話議員嚟協調係為攞分,呢個講法係非常唔禮貌,亦絕對唔同意佢嘅講法,即時叫嗰個職員收返句說話,佢話嗰個職員亦即場收返。
佢認為職員嗰句說話,反映唔體恤市民苦處,冇同理心去幫助市民,今時今日咁嘅服務態度唔得,又話運輸及物流局唔單止要想辦法堵截「黃牛飛」嘅問題,仲要同金巴傾下喺呢啲突發嘅情況下,點樣可以幫到乘客。
當颱風遠走之際,元朗阜財街大廈天台發生火警,當區議員周浩鼎帶埋班支部兄弟去咗火災現場。喺大火撲熄後,佢哋就喺天台位置講返火災嘅情況,萬幸嘅係冇人傷亡,交通亦逐步恢復。唔知係咪畀之前電纜橋起火導致大停電嚇親,佢班兄弟仲特別強調今次火災同中電冇關係。明解嘅,正所謂一朝被蛇咬,十年怕草繩吖嘛!
另一議員郭偉強身兼東區區議員,喺尋日落咗8號波之後,佢亦即刻落咗北角,仲喺橫風橫雨下擔住把遮做Live,直擊路面交通情況。