政Whats噏：何俊賢閉環期間冇互動　葛珮帆：其他議員唔使檢疫

漁農界議員何俊賢(高佬賢)前日(2日)確診，雖然佢冇參加7.1官方活動，但喺6.30曾與一眾議員合照。屬同一政黨嘅議員葛珮帆(EQ)估計高佬賢正在家隔離，該黨亦曾詢問過有關當局，由於高佬賢冇出席7.1活動，而喺酒店檢疫期間，亦冇除口罩同其他議員互動，故其他議員不被視為密切接觸者，毋須檢疫。

EQ仲話出席7.1活動嘅議員同嘉賓，喺活動結束後一周，仍須每日做快測同量體溫，佢今早快測結果並冇感染病毒。

另外，全國人大常委譚耀宗日前亦確診，佢今朝接受電台訪問時話已獲醫管局處方藥物，亦有向中醫教授求診，現已退燒，只係仲有少少咳，徵狀好似感冒咁，但今朝快測結果仍係「一粗一幼」，即有淺色嘅「T」線，仍然係有病毒感染，需要繼續休養。佢又話早前由北京回港後一直接受閉環管理，身邊朋友都冇染疫，佢唔明白自己嘅感染途徑。