政Whats噏:洪為民上載照片祝友生日 網友大驚:又唔用口罩?

2022年07月04日 19:15
東網電視
更多新聞短片
洪為民(前右二)話呢張相係N年前影嘅。
今年1月初爆出「洪門宴」惹起軒然大波,事件主角、選委洪為民事後潛水一段日子後,近排已經「上水」。點知日前佢喺社交平台上載咗一張相,仲寫咗「生日快樂」4個字再引起關注,有網友隨即好緊張咁留言「又唔用口罩?」
「洪門宴」係洪為民生日派對,喺流出嚟嘅相可見佢係冇戴口罩唱K,依家喺社交平台又係話生日,應該祝朋友生日,而呢張相佢都係冇戴口罩。竟然冇吸取教訓,又再重蹈覆轍?難怪會嚇親網友。跟住佢就回應話「N年前喔!我退休都兩年啦!」意即呢張相係好耐之前影嘅,至於退休,佢着緊嗰件西裝有交通安全服務隊嘅徽號,而佢曾任交通安全隊總監,任期去到2020年,即係退咗休兩年嘞!而喺舊年佢轉咗做榮譽總監。
相信大家仲記得,呢場風波係因為生日派對後有人染上新冠肺炎導致事件曝光,更揭發部分人違反「口罩令」同無使用「安心出行」,其後政府對涉事嘅15名官員進行調查,而喺公布調查報告前,涉事嘅前民政事務局局長徐英偉已經主動辭職。