政Whats噏：還押戴耀廷體能下降　跑3公里肌肉開始痠痛

能夠跑幾遠同跑幾耐，可以話體魄嘅指標。官司纏身嘅港大法律系前副教授戴耀廷，雖則涉及2014年違法佔領行動(佔中)嘅案件已服刑完畢，但因發起前年民主派「35+」初選，涉違《港區國安法》仍然還押待訊。長期嘅鐵窗生涯，佢嘅健康狀況雖然正常，但體能方面就似乎走下坡。

有練跑習慣嘅屯門前區議員朱順雅今日(7日)去監獄探望戴耀廷，事後朱喺社交專頁貼文，話戴望落比去年十二月略瘦，但精神氣色唔錯，依舊健談。之但係一講起跑步，戴就話以往多數可跑完6公里，但最近跑到3公里左右，肌肉就開始痠痛，至多跑到4公里就要停步。

朱順雅聞言，惟有講啲安慰嘅說話，話自己最近都跑少咗，但相信大家只要繼續練跑，持之以恒，跑速同里數都可逐漸提升咁話。