政Whats噏：大仔中招竹篙灣過生日　張欣宇伴隨左右　

人生計劃總係追唔上變化，就好似新界北議員張欣宇咁，佢本身打算喺周末，同屋企人到迪士尼樂園慶祝大仔生日，奈何仔仔今日(29日)出現發燒徵狀，結果證實確診。而因為屋企條件未必能符合單獨隔離嘅要求，加上弟弟妹妹尚年幼，佢就決定同大仔去竹篙灣隔離7天，而佢哋仲有特別嘅經歷添！

張欣宇指事件令佢同太太都好憂心，而佢、太太同另外2名子女就未有中招。佢亦指呢個周末係仔仔生日，本來去迪士尼遊玩變成入住竹篙灣，而到達竹篙灣時，咁啱見到迪士尼樂園嘅煙火表演，無諗到換咗另一種方式入住，仲歎息指「人生本來就是如此，既來之，則安之」。

不過為咗防止疫情擴散，張欣宇指下周嘅工作會議將會盡量轉為網上討論，地區方面有同事會幫手跟進，而喺立法會辦公嘅同事未來幾日都會盡量在家工作同休息，避免出席公開活動。