政Whats噏:穿病人衫憶在囚日子 邵家臻觸景傷情?

2022年08月06日 21:14
東網電視
更多新聞短片
邵家臻指自己視力欠佳,在囚時不能操作衣車。
曾因違法佔領行動(佔中)案而被判囚嘅前議員邵家臻,儘管恢復自由多時,但鐵窗生涯仍然刻骨銘心。尋日(5日)佢因腎功能問題而入院做檢查,期間不禁想起過去喺赤柱監獄服刑嘅日子,因為佢穿着醫管局嘅病人衫褲,咁啱佢都有份製造㗎。
邵家臻喺社交專頁貼文,指自己因視力欠佳,在囚時不能操作衣車,只能分擔絲網印刷工作,以及將剛完成嘅病人褲摺得整齊,如今入院竟穿上自己過去有份製造嘅病人衫褲,心情都可謂百般滋味啦。佢又嫌醫院飯難食,雖然較監房好,但比其他都要差,佢形容醫院飯嘅菜,簡直係煲完湯嘅菜乾!
喺吊過鹽水、食過降鉀藥之後,巡房醫生認為佢嘅腎指數回復正常,可以出院回家休息,但要排期日後照超聲波。佢話往後會更注意飲食嘅鉀含量,又話自己答應過親友,要減磅控體重。