政Whats噏：首架純電動小巴將投入服務　議員促政府加大支援

政府近年大力推動使用電動車。3位議員今日(6日)到香港本地科研公司視察電動小巴同埋充電設施。其中議員顏汶羽話，觀塘裕民坊公共交通交匯處嘅小巴總站將成為全港首個電動小巴充電站，將會有首架純電動小巴投入服務，佢期望更多電動小巴「落地」，可以令市民體驗到零排放、寧靜小巴嘅服務。

實際上，裕民坊電動小巴充電站已經講咗好多年，但一直未有太大進展，3位議員期望政府喺全港增加更多相關嘅充電設施，提供更大誘因促使業界更換電動車。佢哋認為推動電動小巴普及化從來都唔係缺乏技術，而係政府缺乏支援，而公共小巴試驗計劃只係一個開始。

顏又指長遠而言，政府應進一步提供技術支援同埋硬件配套，包括增加充電配套、購買同埋維修上提供財政支援等，令業界更有信心，認為咁樣先可以真正推動電動公交嘅發展，向零排放、清新空氣同智慧城市嘅願景邁進。