政Whats噏:已辭哥球會會長 民青局副局梁宏正避利益衝突?

20220808
東網電視
更多新聞短片
梁宏正已辭去哥球會會長一職。
近日各界就上屆政府提出收回粉嶺高爾夫球場32公頃用地,而當中9公頃用作建屋一事惹起爭議。有人認為該地有高生態保育價值,而且作為建屋嘅用地狹小,房屋供應有限。香港哥爾夫球會亦反對收地。原來民政及青年事務局副局長梁宏正已經辭去該會會長一職,唔知係唔係為咗避免利益衝突?
民青局發言人回應東網查詢話,梁喺出任民青副局長前,即7月25日前,已經辭去哥球會會長一職,仲話改組後嘅民青局唔再負責體育事務,所以辭職唔關利益衝突事,只係想專注政府工作。
睇返哥球會嘅網頁,暫時由副會長郭永亮署任會長。郭回應東網表示,梁以私人理由辭去會長一職,佢亦相信梁加入政府, 由於職務範圍唔同,唔會影響收地。高球會下月會舉行周年大會,屆時會選出新任會長,郭透露暫時未有人表示有意出選會長。另外值得留意嘅係,網頁中歷任會長嘅名單,暫時見唔到梁宏正嘅名。該球會發言人回應東網查詢話,梁宏正喺7月22日辭去會長一職,球會9月會舉行會員大會,選出新一屆會長,而網頁就會喺會員大會後更新網頁上嘅有關資料。照咁聽落,梁宏正個名唔係「被消失」,會員大會之後就會出現喺歷任會長嘅名單之中。