政Whats噏：落車冇戴口罩　黃傑龍避過一劫多得佢

依家確診數字日日超過4,000宗，有專家話更可能會飆升一倍去到1萬宗，可以想像社區傳播鏈多到不得了，真係人人自危，但係環境運動委員會主席黃傑龍(Simon)日前竟然唔記得戴口罩出街！不過都好彩避過一劫，唔使罰5,000港元。但又係邊個打救佢呢？

話說Simon日前喺社交平台貼文，劈頭就話「好兇險、好兇險」。乜嘢咁兇險？佢話啱啱坐私家車去中環，因為喺中環落車好緊張，落咗車1秒之後感覺點解好似冇咁辛苦，原來佢唔記得戴口罩，個口罩漏咗喺車裏面，跟住佢大喝一聲希望架車停番低，點知都係失敗咗，架車轉眼就走咗。

佢話嗰一刻嗰種無助，直頭心諗準備定5,000港元罰款㗎喇，但佢都四圍望睇吓有冇便利店，或者睇吓邊個地方有機會有口罩賣，點知就見到間「X旅巴士」，Simon就膽粗粗走入去大叫救命，問可唔可以賣個口罩畀佢？點知個「店員」二話不說攞咗個私伙口罩畀佢，佢再問多句確認「唔收我錢？」店員擰擰頭仲叫佢走，當時Simon即刻鞠躬，兼大聲講「多謝晒、多謝晒」。真係避過一劫喎，都算有驚無險。