政Whats噏：被通緝許智峯　悉尼餐廳內遭潑水斥人渣　稱已報警

因涉多宗案件、被港警通緝嘅前議員許智峯，日前(7日)網上傳出佢喺澳洲悉尼某餐廳內，遭到一名華裔男子舉起水杯潑水濺濕，並指斥佢係人渣、又揚言「打鑊你！」及後許喺社交專頁貼文承認有呢件事，仲話事後已向當地警方等多個部門作出舉報。

日前網上傳出，有人目睹許智峯喺餐廳內同友人會面，期間許身後一位男士突然站立，向許潑水同大叫「人渣」，又話若非現場人數眾多，早已攻擊許，之後相關人士同相信係佢太太嘅女士離開餐廳，但其後相關人士又獨自折返，將手搭喺許膊頭，話下次再見到許的話，就對許不利。餐廳職員見狀立即上前調停，要求該男子離開。

許今日(9日)喺社交平台貼文話作為政治人物，因為政見唔同，過去都遇過類似嘅情況，都盡量不回應不糾纏，以免衝突升溫，佢亦唔會對事件介懷，但就認為今次係涉及直接襲擊及威脅使用暴力，已經分別向當地警方、澳洲聯邦警察、澳大利亞安全情報組織及澳洲國家安全部作出舉報。