政Whats噏：何永賢睇過渡性房屋　議員促加快上樓進度

香港生活指數高昂，居大不易，基層市民要入住公屋，輪候時間更高達6.1年。立法會改善基層住戶環境事宜小組員會主席鄭泳舜與多位議員，今日(9日)聯同房屋局局長何永賢，視察用作過渡性房屋嘅賓館同酒店。雖然賓館嘅居住環境，較劏房要好得多，出席活動嘅議員仍敦促當局要簡化建築流程、加快落成公屋，以縮短基層上樓嘅輪候時間，畢竟過渡性房屋即使好過住劏房，但終究只屬於暫住性質。

政府喺去年4月推出「過渡性房屋賓館計劃」，資助社福機構租用酒店及賓館作過渡性房屋，然後再出租予有需要市民入住。之不過有住戶擔心，兩年營運期一旦屆滿，相關酒店或賓館不再同社福機構續約，而自己又未上到公屋的話，咁就會無處棲身，要瞓天橋底啦！有份去視察嘅議員陸瀚民，就話佢今日接觸到嘅住客都比較樂觀，唔擔心呢件事，強調立法會「唔會容許呢件事發生」。陸認為酒店或賓館嘅過渡性房屋，短期內可以幫助基層市民嘅居住需要。況且，由社福機構做「二房東」，一旦遇上物業管理問題住客都會有求助對象，希望政府可以提供更多金錢誘因，促進公私營合作。議員盧偉國就覺得政府應加強過渡性房屋嘅宣傳，令到基層市民輪候公屋期間，可以住喺一個比較好嘅環境，而無需屈居喺不適切房屋。

議員除咗參觀用作過渡性房屋嘅賓館同酒店，又到土瓜灣探訪劏房戶。議員李鎮強話見到劏房裏面，住咗帶住兩個小朋友嘅媽媽，環境實在侷促，但幸好即將搬去過渡性房屋居住。李鎮強認為當局應該加快改建荒廢校舍，及以組裝合成嘅方法，盡快提供更多過渡性房屋。講起組裝合成，尋日何永賢到訪洪水橋，參觀房協首個洪水橋專用安置屋邨，而呢度就係就用咗新技術組裝合成建築法，興建三百個資助出售房屋單位，不但提升建屋質素、縮短工期，亦可減少工程廢料。