政Whats噏：颱風木蘭來襲　區議員辦事處變「水簾洞」

颱風木蘭來襲，三號風球高懸，理論上置身室內，可免受風吹雨打。之不過，西貢區議員陳耀初，其位於將軍澳厚德邨嘅議員辦事處，沛雨甘霖竟降自樓底天花，地面不但出現水浸，牆身亦都遍佈水珠，到底發生咩事呢？

即使室內都要撐起雨遮，但陳耀初對於恍如「水簾洞」嘅議辦景像，仍可從容面對，不但拍片上載社交平台，仲留言話「三號風球，辦事處喜迎夏露」添！佢解釋話，由於大廈雨水渠淤塞，雨水積聚未能順利排出，於是就沿住天井流入辦事處。

佢話議辦有8成嘅地板都濕咗，但好彩就冇乜財物損失，影印機、飲水機同雪櫃等電器都安全冇漏電，雖然話淨係需要抹乾傢俬、重新擺位就得，但議員辦事處今日(9日)下午仍需關閉。