政Whats噏:美食展掃貨 林健鋒消費券找數「使凸咗」

2022年08月11日 20:29
東網電視
更多新聞短片
林健鋒(右一)同梁君彥(左一)去咗美食展。
政府喺早幾日發放第2階段消費券,頭一輪2000港元,相信唔少市民都差唔多使晒嘞,而行政會議員、商界議員林健鋒竟然使凸咗喎。點使呀?
林健鋒今日(11日)喺社交平台貼文,話拉埋老友、立法會主席梁君彥一齊去美食展。雖然無得試食,但都冇影響市民掃貨嘅心情,林健鋒都買咗唔少嘢,包括西班牙風乾火腿同黑松露菌醬、牛肝菌濃湯、日本燒酎、本地手工啤酒同薯片、沖繩香檸汁、日本一番桃、泰國紅寶石柚子同韓國米酒等。咁多嘢,幾錢找數?佢話喺用啱啱攞嘅消費券找數,仲使凸咗添呀!係使凸咗倍半。事關佢買嘅嘢用咗大概5000港元,消費券只有2000港元,即係仲要使多3000港元。
對於政府一方面將抵港檢疫放寬至「3+4」,但另一方面就實施「紅黃碼」,黃碼人士喺4日醫學監察期內禁止進入亞博、會展等嘅表列處所。林就期望政府能夠以民為本,放寬有關安排,畀醫學監察期間嘅入境人士,喺佩戴口罩嘅前提下,能夠進入展覽場地等處所。