政Whats噏：C15+暑假出動　第1擊竟然係食燒豬

早前都講過立法會有個新山頭叫「C15+」，代表咗辦公室設喺中信大廈嘅一班議員。起咗朶大約個半月，都未見佢哋有乜動作，原來佢哋趁住立法會放暑假出動，估唔估到佢哋嘅第1擊做乜？呢次行動喺由「C15+」嘅成員之一、選委會界別議員劉智鵬帶隊嘅，係乜嘢行動？畀個貼士，佢係研究香港歷史嘅。有冇頭緒呢？

開估喇！議員陳紹雄日前喺社交平台貼文同上載咗啲相，原來劉智鵬帶搞咗「地爐豬」考察團，邀請咗「 C15+」幾個議事去屯門藍地嘅「柴火燒豬工場」，等佢哋現場體驗場下碩果僅存嘅3個已逾50年歷史嘅柴火地爐。

陳紹雄話劉智鵬即場講述喺日治時期嶺南大學喺屯門藍地研究養殖優質豬種嘅歷史，而工場老闆就介紹「地爐豬」係全港唯一擁有柴火燒味牌照嘅工場，柴火燒豬工序好多，加上冇新人入行，仲要面對環保問題，但係佢哋就一直堅守用柴燒，而班議員仲有機會品嘗包括美味嘅柴火地坑香脆燒豬腩，佢話口感同味道喚起咗兒時嘅回憶添！