政Whats噏：去到50+　哪吒嘅人生下半場係做...

去到某個年紀，就會思考人生嘅一半場應該做乜？相信好多人都好困惑，所以要有目標先得，好似西貢區議員方國珊(哪吒)，佢亦都做咗選擇。

以前都見過哪吒喺中學時代嘅青純照片，今次唔係舊照，係新鮮出爐嘅學生照，事關佢今日(15日)「開學」。佢喺社交平台貼文，話重返校園生活，做返「學生妹」。點解？佢話喺人生嘅下半場唔應該自我設限，認為要多看多嘗試，所以決定增值，要活出不一樣嘅50+。

咁讀乜嘢先？哪吒本身係屋宇工程師，依家再選擇修讀理工大學工程碩士課程。佢話過往職業安全健康都會提及「沒有最安全，只有更安全」，但現實係仍然有唔少工業意外，而佢以往喺社區協助處理唔少樓宇結構嘅個案，所以期望透過進修，將來改善建築安全、意外預防同施工現場嘅安全喎。