政Whats噏:長者買唔到故宮飛 陳家珮批安排冇人情味促優化

2022年08月15日 21:05
東網電視
更多新聞短片
唔少市民話香港故宮文化博物館一票難求。
西九文化區嘅香港故宮文化博物館喺7月初開館,想睇嘅人好多,但一票難求,好多市民網上搶唔到飛,反而要幫襯旅行社嘅一天團先去到。議員陳家珮(Judy)亦話買飛要經過幾重挑戰,最後都係要幫襯專賣旅遊門票嘅網頁先買到飛,直指依家咁嘅買飛安排欠人情味,唔識用電腦嘅嘅長者更加係望門興嘆,佢話有關方面應該優化下買飛嘅安排。
Judy日前出席一個網上節目,主持人話收到有唔少市民,尤其係老友記嘅投訴,話想去故宮博館睇文物,但一票難求,事關要網上預約,而作業系統嘅介面唔容易操作,佢哋預約唔到,但就見到坊間嘅旅行社或旅遊中介有得買,不過就要報一日遊嘅團。
由於唔少館內文物嘅展覽係有限期,可能好快就會運返北京。Judy話因為議員嘅身份去過故宮博物館兩次,知道要睇晒啲展品都需要頗長嘅時間,而因為屋企人想去睇,佢都試過買飛,都要經過幾重挑戰,最後都係喺旅遊門票嘅網頁買到,嗰次買咗飛就遇到打8號風球,去唔到嘞!
佢話依家買飛嘅安排唔係咁有人情味,譬如喺故宫博物館嘅網站,一定要先登入一個西九文化區嘅帳號,要畀啲資料,可能因為實名登記喇,但奇怪嘅係本身西九文化區又唔使畀名,佢覺得可以做得令人更方便使用。佢又話依家問題出現咗喺官網買唔到飛,令一啲買唔到飛嘅人一定要參加旅行社嘅一天團先去到故官博物館,咁唔係咁理想,因為去到故宮博物館,梗係想慢慢睇,但可以想像參加一天團係點樣嘅,好似趕鴨仔咁,入到故宫只有個幾兩個鐘,睇唔啲乜嘢。雖然明白有啲門票係要分畀旅行社,但啲比例係點呢?呢啲問題必須要多啲向有關方面反映,要優化買飛啲安排。
主持人就話特別係近呢幾年,疫下好多市民留喺香港冇得外遊,博物館係好受市民歡迎嘅去處之一,都係要網上預約,但係咁多博物館冇站通,唔可以一個網站搞掂晒,老人家需要喺唔同嘅網站買飛,又有唔同難度,只能望門興嘆,政府應該優化下。Judy都話始終好多長者未必識得用電腦,亦未必識用網上科技,又唔鍾意求人,唔想煩到啲後生,所以政府都要諗下方法,點樣能夠方便買飛。