政Whats噏：還押戴耀廷常睇烹飪節目　何俊仁做「碌」線頭

前年發起民主派35+初選嘅戴耀廷，涉違《港區國安法》被控串謀顛覆國家政權罪，現仍在還押。有前區議員去探過佢，話佢依家經常睇烹飪節目，想學好廚藝，日後為太太下廚喎。

因為天氣太熱，該名前區議員話戴仍然堅持每日跑步5公里，所以佢剪咗個skinhead嘅髪型，又引述戴話呢個新髪型，令怕熱嘅佢感覺涼爽得多，喺每日跑步、做掌上壓同拉筋後，打理頭髪時都相對容易。

至於支聯會前副主席何俊仁，因涉嫌煽動顛覆國家政權被控後一直還押，探過佢嘅前區議員就話何喺獄中被分派做「碌」線頭，每日用一個近似「鬚刨」嘅小電器，逐條檢視獲分配嘅褲，若果發現有多餘嘅線頭，就好似剃鬚咁，「碌」走啲線頭。