政Whats噏：疫下身處海外　林新強憂非中國籍港人失永居權

香港係華洋雜處之地，有唔少非中國籍嘅港人。然而非中國籍港人要保持香港永久性居民身份，就唔可以連續36個月或以上不在香港。法律界議員林新強指長達3年嘅疫情，對一啲身處海外嘅非中國籍港人，不但構成回港嘅障礙，更有可能失去永久性居民身份。林話會趁住明天(17日)立法會前廳交流會嘅機會，向政務司司長提出建議，以免人才流失。

其實選委界議員梁美芬去年9月亦已提過相關問題，而保安局書面回覆指有酌情空間，會考慮該個案嘅情況。之不過，本港嚴格嘅防疫政策，對於好多身在海外嘅非中國籍港人而言，親身回港無疑要付出金錢同時間嘅代價，林新強早前到訪新加坡，曾接觸當地嘅非中國籍港人。林認為政府不宜墨守成規，建議應容許佢哋網上辦理手續，以免成為香港人才流失嘅另一道缺口。林慨嘆話，香港將黃金機會拱手讓予新加坡，實在太多啦。

雖然林新強屬於功能界別，但佢打算喺元朗老家，開設地方辦事處以聽納民情，並招攬有意服務社區嘅人士，同時利用自己嘅法律專長協助街坊。辦事處預計喺今年9月尾或10月頭開幕。