政Whats噏：容海恩認無時間陪家人　錯過小朋友成長

議員容海恩早前登報，同涉嫌干犯《港區國安法》嘅老爺袁弓夷脱離關係，外界都對佢屋企關係有所揣測。容喺電台節目時承認工作繁忙，同丈夫袁彌昌、2個小朋友相處嘅時間較少，話都有啲過意唔去，一日可能少過半個鐘見到佢哋喎。

容喺節目中話，自己話就話家人第一，但實際上並唔容易，因為公務上好難調整到，例如要與唔同嘅地區組織開會，都要作取捨。佢又話，2個囡囡都係由工人同家人照顧，承認同小朋友相處時間好短，因為返工時間同小朋友作息錯開，唯有返工後或者食晏時間衝返屋企見一見。佢話有感錯過囡囡嘅成長，例如小朋友去公園、去圖書館同其他小朋友互動，佢就錯過晒呢啲開心嘅環節。

訪問中，容形容自己係愛玩嘅人，尤其喜歡打機；亦透露小五曾留班，皆因無乜讀書，到會考成績較差，覺得遇上好大挫敗。不過，佢又話讀書差無所謂，抵得諗先緊要咁話。