政Whats噏：社民連會慶酒席遭取消　陳寶瑩：未必會另覓場地復辦

社會民主連線(社民連)主席陳寶瑩喺社交專頁貼文，指礙於疫情及其他原因，社民連停辦會慶已經3年，本來原定於本周六(20日)於旺角某酒樓舉辦晚宴，與義工友好聚首一堂，互相打氣加油。但佢今日(18日)接獲酒樓總經理致電通知，周六(20日)嘅酒席已被取消，並拒絕解釋原因。

陳寶瑩指是次晚宴，係社民連同一眾友好嘅聚會，純屬聯誼性質，約一個月前向酒樓預訂酒席12圍。為符合政府嘅防疫規定，每張枱限坐8人，而晚宴嘅收費，就係1500港元一位。對於今次晚宴遭到酒樓單方面取消，陳寶瑩話感到無奈但理解，並承諾盡快安排退款事宜，又話對香港如今容不下一個政治團體嘅聯誼活動感到遺憾。

至於會否另覓場地復辦晚宴，陳寶瑩話未必，畢竟今次聚會已經係非常低調，但仍生枝節，恐怕好難再搵到其他地方願意承接佢哋嘅宴席。